News Details
Print this page
ՄՈՆԹԵԿՐԱՓՓԱ-ԷՐԵԲՈՒՆԻ ՀԱՅԿԱԿԱՆ ԳՐԻՉԻ ՑՈԻՑԱԴՐՈՒԹԻՒՆ՝ ՊԷՅՐՈՒԹԻ ՀԱՅԿԱԶԵԱՆ ՀԱՄԱԼՍԱՐԱՆԻՆ ՄԷՋ

Սոյն տարուան Դեկտեմբեր 15-ին, երեկոյեան ժամը 7:00-ին, Պէյրութի Հայկազեան համալսարանի Մաթոսեան սրահին մէջ պիտի  բացուի “Էրեբունի Հայկական Գրիչ”ի առաջին հանրային ցուցադրութիւնը Լիբանանի մէջ:
“Էրեբունի Գրիչ”ը նախաձեռնութիւնն է Արաբական Միացեալ Էմիրութիւններ հաստատուած երկու ակնառու հայ գործարարներու՝ Գրիգոր Ճապուրեան եւ Տիգրան Չապլաքեան:  Անոր ձեւաւորումը գործն է լիբանանահայ արուեստագէտ Գրիգոր Կարապետ Սագայեանի, իսկ արտադրութիւնը՝ Մոնթեկրափփա հաստատութեան, որ գրիչներու արտադրութեան Իտալիոյ ամենահին հաստատութիւնն է եւ աշխարհի ամենաբարձրակարգերէն մէկը: Գրիչը հրապարակուած է երեք տարբերակներով՝ «Հոգեւոր», «Յաւերժ» եւ «Գրական»:
“Էրեբունի Գրիչ”ին կ՛ընկերանայ ութ լեզուներով յուշամատեան մը, ուր ներկայացուած են Հայ ժողովուրդի պատմութեան մէջ իրենց կարեւորագոյն ներդրումը ունեցած 61 հայ անձնաւորութիւններ: Գիրքին հեղինակն է դոկտ. Հայր Մեսրոպ վրդ. Թոփալեան:
Զարդարուած հայ դարաւոր արուեստէն եւ հոգեւոր մշակոյթէն ներշնչուած խորհրդանիշերով, “Էրեբունի Գրիչ”ը իւրայատուկ նշում մըն է Հայոց ցեղասպանութեան 100-ամեակին եւ գեղեցկագոյն մեծարում մը՝ հազարաւոր տարիներու ընթացքին Հայաստանի ու Հայ ժողովուրդի ստեղծած մշակութային արժէքներուն: Անիկա առաջին անգամ ներկայացուեցաւ 2015-ի Պազելի միջազգային ցուցահանդէսին, Զուիցերիա, արժանանալով լայն հետաքրքրութեան: Էրեբունի Գրիչ”ի հաւաքածոն 23 Նոյեմբեր 2015-ին ստացաւ Middle East Jewellery -Year 2015 մրցանակը, “Լաւագոյն Արուստի եւ Ձեռարուեստի Գործ” դասակարգումին մէջ, ճանչցուելով լաւագոյնը՝  382 մրցոյթային գործերուն մէջ:

“Էրեբունի Գրիչ”ի նախաձեռնող խումբի անդամները շրջագայած են բազմաթիւ երկիրներու քաղաքներ, գրիչի ներկայացման համար: Ցարդ գրիչի ընտրանի հաւաքածոյի նմոյշներէն ընծայաբերուած են Հռոմի Ս.քահանայապետին, Ամենայն Հայոց եւ Մեծի Տանն Կիլիկիոյ կաթողիկոսներուն, Կաթողիկէ հայոց կաթողիկոս պատրիարքին, մարոնիներու պատրիարքին, Հայաստանի Հանրապետութեան նախագահին, պետական աւագանիի անդամներուն, մեծ երաժիշտ Շարլ Ազնաւուրին, արուեստի զանազան գործիչներու:
Հայկազեան համալսարանին մէջ կայանալիք ցուցահանդէսի բացումին տեղի պիտի ունենայ յատուկ աճուրդ, որուն հասոյթը ամբողջութեամբ պիտի տրամադրուի Լիբանանի եւ Հայաստանի մէջ կարիքաւոր մանուկներու: Աճուրդի պիտի դրուի Էրեբունի Յաւերժ մէկ արծաթեայ գրիչ նախնական գինը՝ (1500 ամ. տոլար), հանրայայտ մարզիկ Հենրիկ Մխիթարեանի մարզաշապիկին եւ գնդակին հետ միասին՝ ստորագրուած իր կողմէ: Մխիթարեան միացաւ գրիչի նախաձեռնող խումբին, նպաստելու համար անոր բարեսիրական ծրագիրներուն: Նոյն նպատակին պիտի ուղղուի նաեւ ցուցահանդէսին գրիչներու վաճառքէն գոյացած հասոյթին մէկ կարեւոր մասը:
“Էրեբունի Հայկական Գրիչ”ի առաջին ցուցադրութիւնը Հայկազեան համալսարանին մէջ բաց պիտի մնայ բացման յաջորդող 4 օրերուն՝ 16-19 Դեկտեմբեր 2015, առաւօտեան ժամը 10:00-էն մինչեւ գիշերուան ժամը 9:00:
 
 

Designed and Developed by
                Ever-Me
Copyright© 2009 Haigazian University